Mark 1

1Nabari manayi Yesu Kristi Shekwoyi Nugun nya kwo ya nlayi nu.

2Ngye shi a cei kafi dna Anabi Ishaya Litafi, Shekwoyi ɓei da ge, Wo ɓa tnu Wo ɓi yi dna nanyi, ama owo tnu-tnu dai ɓa ɓe na bye wa zhin anyi zhi ntu wo ɓe-ɓe ɓo. 3“Tnu-tnu dai ye ɓei dna zhabui nu, wa da nabari ge aza vinya ɓa zhin ɓa sese aba kafin Dagayi wo ɓe,” nya nu Ishaya ɓei da.

Yohanna Batizma Zhinyi

4Tnu-tnu dai ye nu ɓo zhin Yohanna Baptisma zhin-yi. Wo ɓo dna zhabui nu woi wu ge, aza vinya ɓapmi avun wu laifi, n na ɓai Shekwoyi wa zhin ɓa gafara, a zhin ɓa baptisma, kwa wu ge lallei ɓa la vun pmi wu laifi. 5Azayi knu n Urushelima n Yahudiya yi, ɓai zanzan fi Yahudiya bmana ɓa gye, ɓai wo Yohanna. Sa n ɓa ɓei yabui, wa zhin ɓa baptisma dna Urdin ʼla. 6Laknumi pa nu ɓei zhin wo je o wo shinpanya epanya nu. Aɓo, n ʼsu zhabui nyai nu ɓei zhin wo nyagyi. 7Wo ɓei zhin wo zhin waʼazi lai nu!

“Zaho ɓe lo safyewyi nwo du mi lo, har mi to knuce lo ma zhin wo baram. 8Mi zhin fye baptisma n nuwan yi, ama wo ɓei zhin fye baptisma n Shekwoyi Zafun yi.”

9Nwyi-hoi Yesu wa gmi n Nazarat n Galili. Yohanna wa zhin Wo baptisma n Urdun ʼla. 10Sa Yesu ɓei gmi ɓe n nuwan, wa gye eshe a guya, Zafun Gyi-gyi-yi n gye lukpe kwoi yatu Wo. 11Begye kwa gmi she, kwa cige, “Oho nu zhin Mi Nugun yeyeyi, Oho nu zhin Ma Gmada.”

12Nsayi-sayi yi, Zafun Gyi-gyi-yi wa lo woi n bmana. 13N zhabui mi Owa nyipyei shinyi n wo gmanyi yi akpe a nyafanya. Shaitan woi zhin Wo jaraba, N na vun amalayika ɓe ɓa zhin Wa tna.

14Nsa dohoyi, Esu Hiridus, woi la Yohanna wan, Yesu wa lo Galili, waʼazi zhin Shekwoyi nabari manayi nya.

15Wa ci ge, “Esa lasi n sayi, Shekwoyi bemi la wo vivi, fye pmi avun wu fya laifi, fya gwo Wo nabari manayi ye.”

Yesu Wa Yi Aɓnu-Tnuyi

16Nwyi-hoi, sa Yesu ɓei zan-zan lo n Galili ʼla gbe, Wa gye Siman n wo zadoyi, Andarawus, ɓai wan awyesala ntuge oɓa bwaze nu ɓei nu.

17Yesu wa yi ɓa, “Fye ɓe fya vi Mi Miɓa zefye a zawan-yi.” 18Nsayi-sayi yi, ɓa fwa ɓa ʼsa, ɓa lo ngnisun woi.

19Nɓa bye fyewyi, Wa gye Zabadi aɓi, Yakubu n Yohanna yi, ɓai zhinɓa asa aba. 20Wa yi ɓa ce, Nsayi-sayi yi, ɓa fwa ɓa dada Zabadi, dna n ʼya, n na kodogoda yi n wo ɓei yi ɓa ɓa viwo nyi.

21Yesu n Wa nugundoyi, ɓa ɓe Kafarnafum Nsatiwyi, nlabmiyi ɓa lo a Yahudawayi aduwa nyakun Wa zhin waʼazi. 22Ca wo aza mwa, ntu ge Wo ɓei daɓo n ikoi gbo n na zaje nya yi. N tu ge Wo to ɓei shan azam.

Aza Cbo-gbo Ba Bwa Kagna

23Ezaho n alijenu ɓei dna n aduwa nyakun wa ya wyiɓe. 24“Knihin nu zhin Hoi gna yi gnagna ya, Yesu Nazaratiyi, Ha ɓe Ha wuyi nu? Mi kpe Ho ye lo, Shekwoyi Nugun Gyi-gyi-yi.” 25Yesu wa gna alijanu yi ge, wola ce pi wa pmi wa gmiya ɓe n zahi mi. 26Zafun nukwoyi ho, wa sa wyi wa pmi wa she zahi ya, wa gmiya ɓe n sayi. 27Ca wo aza mwa, ɓa daɓo ɓai cige, “Kni adini woi-woyi nu nyia? Har a zafun nukwoyi wo Wo begye.”

28Nabari deye kwa gnami, har Galili kni vinya.

29– 30Sa n ɓa ɓei fwa aduwa nyakun, Owo, n wa barayi ɓa lo Siman n Andarawus yi puva. Ɓa gye Siman yezhi dna n nayi-napye kaladayi, ɓa gna Yesu wo ɓo n sayi-sayi yi. 31Walo wo gado gbe, Wa shiwo bwa Wa bmawo zhin wa sase, nayi-napye yi ho kwa fawo, wa laka n sayi wa zhin ɓa nyagyi.

32– 33N wyeshe yi a kpemi ɓa nu, na nyasan yi n na lijanu dayi, n na bai Wa ka ba gna. Aza n mwa begye ɓa kun n Kafarnafum zhimi n na bayi ɓa gye Wo. 34Yesu wa ka aza gna n wyeshe-yi n mwa. Wa gnakni alijanu ge ɓa kun na za mi. (Amma woto ɓei ye ge alijanu da ɓom, ntu ge ɓa kpewo-ye lo.)

35N labmi yi Wa kpesa, Wa laka Wa lo zhabui, Wa zhin aduwa.

36– 37Nsa dohoi Siman n na zajeyi ɓa lo Wo zanyi, ɓa gna Wo ge, “A za nya Ho ɓo lo.”

38Ama Wa dna ɓegbe ge, “Dole ya lo a zhido, Mi gna ɓa nabari ce, gama Maɓe ntu cenu.”

39Wa zan laɓa n Galili kni, woi zhin waʼazi n na aduwa nyakun, woi lo a zaya mwa na lijenu iko. 40Nsa hoi Kuturu wa ɓe wa yashi n Wa bye wa gyi Wo wye ge, Wo kawo gna. “Nhaye, Ho bami Ha kami gna.” Bma mi Zhin.

41Yesu wa gye wo sun-sun Wa towo bwa Wa cige, “Mi laye, la kagna!” 42Nsayi-sayi yi, wa kagna bwa.

43– 44Yesu wa gnawo, “Lo Ayahudawayi pirist aba wo dnahowye. To kpe gni ha da ɓo n zayi n zokwom, lo n nyaga yi shi n Musa ɓei zun tu kuturu n wo la kagna bwa n nabayi a za kpe lallei hola lafiya bwa.”

45Ama sa n wo ɓei lo n zokwo, wa ya wyidna ge wola lafiya bwa, n tu cenu aza shekna Yesu har to wami nwo lo ezhi doho-doho yim, sai dna zhabui mi azayi knu na bai gbo-gbo ɓai ɓe dawo ɓo.